近年來，政府官員更為明哲保身，多一事不如少一事；各方能人不敢當官，恐惹火焚身；真要做事的，很多時會被攻擊得體無完膚，諸事無成。
很多香港人的生活水平不進反退，和新加坡的發展比較，差異更為突出。
***************************************************
[東周網] 反國教反自駕 同一班友 東北大戰搞手起底
上周六新界東北開大片，一支白衫軍殺入諮詢會場反收地，同新界佬拳來腳往，現場亂過亂世佳人，乜諮詢都做唔成，波哥最後仲要落荒而逃。白衫軍今鋪搞局只係前奏，個party剛開始咋，政府仲有排頭痕！
表面睇，呢單嘢好似只係一班農友同村民爭權益，實情其實冇咁簡單，心水清老友一直留意事件發展，發現後面一班搞手熟口熟面，反國民教育、反自駕、反對清拆菜園村、反高鐵、反規劃，以至舉港英旗搞香港自治，都係同一班友，佢哋好似毛主席當年打游擊咁，周圍流竄，四處點火頭，連政黨都畀佢哋牽住鼻子走。
老友指，今次反東北發展嘅主腦係「土地正義聯盟」，呢個組織去年成立，前身係反高鐵大聯盟及菜園村關注組，核心成員包括以搞嘢為業嘅朱凱迪、「社運女神」葉寶琳、保衛皇后碼頭一戰成名嘅王浩賢、學運分子沈偉男、「革命教授」司徒薇、「反對被規劃」嘅陳劍青，以及社民連成員黃俊邦等。
呢班社運分子當年反高鐵搞到天下大亂，本來想守住菜園村做「革命基地」，但居民收到極筍賠償紛紛散水，班友唔想個party完，一年前轉戰新界東北，用當年搞菜園村事件嘅經驗，發動區內部分寮屋及非原居民小村落，照辦煮碗舉起「不遷不拆」旗幟，藉所謂保衛家園，反對東北發展，老友稱之為「輸出革命」。
呢班搞手不單止搞地區行動，亦係其他「運動」嘅旗手，例如「土地正義聯盟」大佬朱凱迪，半年前就搞咗次反自駕遊大遊行，表面上不滿內地汽車來港，其實利用呢個議題，反對「一國」同「中港秘密協議」，為本土運動造勢。遊行當日，反國民教育大聯盟發言人沈偉男亦係帶頭成員，呢次行動完咗冇耐，佢就轉移陣地去搞反國教。
早前反國教大聯盟佔領政府總部，出嚟見傳媒嘅發言人葉寶琳，亦係菜園村關注組成員，近期都有同朱凱迪去新界東北傳授「革命」經驗，國教之戰暫時停火後，佢就走去打東北保衛戰。呢位女士係嶺南大學文化研究碩士，○七年已參與保衛皇后碼頭，同另一搞手王浩賢結下「革命情緣」，其後又加入反高鐵大聯盟，去年副總理李克強訪港大掀起風波，佢有份發動批鬥徐立之大會，早前紀念六四遊行，佢同朱凱迪等人操去北角警署，更霸佔英皇道，結果被拉，上周六遭法庭判非法集會罪名成立，可能要入冊，可見佢搞社運十分勇猛，故得到「社運女神」稱號。
土聯另一執委陳劍青，負責帶領分支組織「反對香港被規劃行動組」，今次反新界東北發展，就係由佢打前鋒，大聲疾呼「屈」政府想搞深港合體，割地賣港，將新界東北送入大陸虎口，好有煽動力。
佢哋背後仲有一個組織網絡，順住追落去可以發現更深層關係。葉寶琳除咗參與反國教及反東北發展，本身亦係天主教正義和平委員會成員，呢個委員會直屬天主教香港教區，涉及各項社會運動，角色都幾微妙。
土地正義聯盟個別核心成員，亦同社民連有連繫，部分行動大家串連一齊搞，其執委王浩賢則係立法會會計界新當選議員梁繼昌嘅選舉經理。
近排有班友經常舉起港英旗幟示威，激到陳佐洱心痛，佢哋自起字頭叫「香港自治運動」，變相鼓吹香港獨立，今次土聯搞反對東北發展行動，呢個組織都有聲援，睇嚟將來有可能結盟。
朱凱迪等曾經想過入建制，年前土聯五個成員一齊參加區議會選舉，結果全線敗北，佢喺八鄉北參選，只得到二百八十幾票，少過新界佬對手零頭，可見佢哋聲大大，其實群眾基礎好薄弱。
***************************************************
